Nakaabot sa ₱62.40 kada dolyar ang Philippine peso kaniadtong Martes, Setyembre 2, 2026, ang bag-ong record low tungod sa pagsaka sa presyo sa lana, geopolitical risks ug kalig-on sa US dollar.
Gidugangan kini og 13 sentimos gikan sa miaging closing rate, nga milapas sa kanhing record low nga ₱62.27 kada dolyar nga natala kaniadtong Agosto 28, base sa datos sa Bankers Association of the Philippines.
Matud sa mga analista ug negosyante nga ang pagkahuyang sa peso kasagarang resulta sa external nga mga hinungdan, lakip ang taas nga presyo sa lana, lig-on nga dolyar ug geopolitical uncertainty.
Bisan pa sa pagtaas sa Bangko Sentral ng Pilipinas (BSP) sa benchmark interest rate og 25 basis points ngadto sa 5% niaging semana, nagpadayon ang pressure sa lokal nga currency tungod sa mga panggawas nga risgo.
Sumala ni Ruben Carlo Asuncion, chief economist sa UnionBank of the Philippines, ang maong mga kahimtang nagdasig sa mga investor nga mobalhin ngadto sa dollar assets ug nagdugang sa inflation ug import cost concerns sa nasud.
Direktang maapektuhan sa huyang nga peso ang mga importer, konsumante ug mga nangutang nga adunay dollar-denominated obligations tungod sa pagmahal sa imported goods ug fuel, samtang makabenepisyo niini ang mga recipient sa remittances ug exporters.
Adunay usab 6.2 bilyong dolyar nga debt-service burden ang Pilipinas sa unang lima ka bulan sa tuig 2026, dul-an sa 5% nga mas taas kumpara sa samang panahon niaging tuig.
Sa panan-aw ni Asuncion, magpabiling ubos ang peso sa duol nga panahon samtang naghulat ang mga investor sa economic data gikan sa Estados Unidos, bisan pa og makatabang ang foreign exchange earnings sa pagpugong sa dakong pag-usab-usab sa currency.
