Gipangandaman sa Davao City Police Office o DCPO ang seguridad alang sa inauguration ug grand opening sa Kingdome pinaagi sa command conference nga gipahigayon niadtong Agosto 31, 2026.
Gipangulohan ni DCPO City Director PCOL Peter Bauzon Madria ang maong conference uban sa mga key officials sa kapolisan aron hisgutan ang deployment sa mga personnel, police visibility, traffic assistance ug security coverage sa venue.
Dugang pa niini, nakig-coordinate usab ang DCPO sa Kingdome security personnel aron masiguro ang hapsay nga pagdumala sa mga tawo ug sakyanan sulod ug palibot sa venue.
Gitakdang ipahigayon ang grand opening sa Kingdome karong Setyembre 1, alas-5:00 sa hapon, diin gilauman ang pag-abot sa mga bisita ug mga miyembro sa KOJC gikan sa lain-laing lugar.
Aduna usab unang impormasyon nga posibleng motambong si Vice President Sara Duterte sa maong kalihokan, apan wala pa kini opisyal nga makumpirma sa pagkakaron.
Sa kasamtangan, padayon ang koordinasyon sa DCPO ug event security personnel alang sa luwas ug hapsay nga pagpahigayon sa grand opening.
