Mikabat sa halos 800 ang kumpirmadong namatay samtang kapin 3,000 pa ang gikatahong nawala human sa grabeng pagbaha ug pagdahili sa yuta sa utlanan sa Nepal ug China.
Nagsugod ang trahedya human sa pagdahili sa dakong glacier sa kabukiran sa Himalayas kaniadtong Miyerkules, Agosto26, 2026 nga miresulta sa kusog nga bul-og sa tubig, bato, ice, ug lapok ngadto sa mga suba sa Trishuli ug Bhotekoshi.
Padayon pang ginapangita ang 3,000 ka tawo sa Nepal ug sa rehiyon sa Tibet sa China, diin pipila ka mga patayng lawas gi-anod paingon sa silingang nasod nga India.
Lakip sa padayong gipangita ang kapin 900 ka trabahante gikan sa 11 ka hydropower projects sa Nepal nga natabunan sa lapok ug mga debris.
Gideploy ang kapin 19,000 ka security personnel ug 16 ka helicopter alang sa search & rescue operation aron masuta ang kahimtang sa mga biktima bisan pa sa dili maayong panahon.
Adunay usab ayuda gikan sa mga eksperto nga grupo ang India ug China, samtang milyon-milyong dolyar nga humanitarian aid ang gitanyag sa United Nations ug nagkadaiyang mga nasod.
Subay sa initial nga datos, milapas na sa 4 bilyong dolyar ang gibanabanang kadaot sa imprastraktura tungod sa kalamidad, samtang nagpabilin ang hulga sa dugang nga pagbaha sa amihanang bahin sa Nepal.
