Gipunting ni Palace Press Officer Claire Castro nga dili angay ikumpara ang mga aliases nga gigamit sa confidential funds sa mga pseudonym o tinaguan o laing ngalan nga gigamit sa mga bayani kaniadto.
Tubag kini ni Castro sa pahayag ni Senator Robin Padilla, kinsa nagtandi sa paggamit sa aliases sa confidential fund receipts sa Office of the Vice President ug sa pseudonyms nga gigamit sa mga bayani.
Matod ni Castro, gigamit sa mga bayani ang aliases aron protektahan ang ilang identidad samtang nakigbisog alang sa nasud.
Apan iyang giingon nga lahi ang sitwasyon sa mga ngalan nga makita sa confidential fund receipts.
Gipunto usab niya nga dili pa klaro kon tinuod ba nga mga tawo ang pipila sa mga pangalan o kon mahimo ba kining “ghost beneficiaries,” base sa mga isyung ginasusi.
Samtang, gipatin-aw sa Palasyo nga dili nila panghilabtan ang pahayag ni Padilla tungod kay katungod kini sa senador nga ipahayag ang iyang opinyon.
Apan giingon ni Castro nga importante gihapon nga klarohon sa publiko, ilabi na sa kabatan-onan, ang kasaysayan ug tinuod nga papel sa mga bayani sa nasud.
