Nakadawat ang kapin 295 ka Indigenous Peoples leaders gikan sa 11 ka munisipalidad sa probinsya sa Davo de Oro sa ilang tulo ka bulan nga honorarium atol sa payout nga gipahigayon sa Provincial Capitol kaniadtong Agosto 25, 2026.
Lakip sa mga benepisyaryo ang Municipal ug Barangay Tribal Chieftains, Federation Presidents sa IP Youth ug IP Women, Ancestral Domain Management Officers, ug mga opisyal sa Indigenous Peoples Organizations.
Gitunol ang honorarium pinaagi sa Provincial Government, kauban si Governor Raul “RM” Mabanglo ug Board Member Albert Camana.
Gipondohan ang maong assistance gikan sa Provincial Peace and Order Council isip kabahin sa suporta sa mga lider nga aktibong nagserbisyo sa ilang tagsa-tagsa ka komunidad.
Matod sa provincial government, importante ang papel sa IP leaders sa pagpatuman sa mga programa ug kalihokan nga may kalabotan sa kalinaw, panginabuhian, social development ug pagpanalipod sa mga ancestral domain.
Dugang pa, gilauman nga makatabang ang honorarium isip dugang suporta sa ilang padayong serbisyo ug koordinasyon sa local government.
Padayon ang provincial government sa pagpalig-on sa partnership uban sa Indigenous Peoples communities aron mas mapadali ang paghatag og serbisyo ug pagpatuman sa mga programa alang sa kalamboan sa probinsya.
