Gipadayag sa prosekusyon ang mga bag-ong ngalan nga giingong nakadawat og confidential funds sa Office of the Vice President o OVP atol sa ika-17 nga adlaw sa impeachment trial.
Gipangutana ni prosecution counsel Atty. Amando Ligutan ang hostile witness nga si Gina Acosta kung nakita ba mismo niini ang paghatag ni kanhi security chief ni VP Sara Duterte nga si Col. Raymund Dante Lachica og tig-P100,000 sa mga recipient nga ginganlan og “Antonio Pagong” ug “Timon Andrew Pusa.”
Mitubag si Acosta nga wala niya mismo makita ang paghatag sa maong pondo tungod kay wala siya sa lugar ug si Lachica mismo, matod pa niya, ang mipatuman niini.
Gipakita usab sa prosekusyon ang mga acknowledgement receipt nga adunay mga ngalan nga “Don Piang” nga giingong nakadawat og P250,000, “May Pamana” og P150,000, ug “Shane Ngitngit” og P150,000.
Lakip usab sa gipresentar ang resibo ni “Xuniso P. Belat” nga giingong nakadawat og P100,000.
Dugang pa niini, gipunting ni Ligutan nga ang “ngitngit” sa Binisaya nagpasabot og “madulom,” ug gikonektar kini sa usa pa ka resibo nga adunay ngalan nga “Andy Lim.”
Sa maong pagpangutana, gipatin-aw ni Acosta nga wala niya mismo nasaksihan ang paghatag sa pondo ngadto sa mga recipient ug nagsalig lamang siya sa mga dokumentong gisumiter ni Lachica, nga maoy responsable sa pagpatuman sa confidential funds.
