Miabot na sa 2,500 ang death toll sa Ebola outbreak sa Democratic Republic of Congo, samtang padayon ang paspas nga pagkaylap sa sakit sa usa ka lugar nga mas lapad pa kaysa France.
Sumala kang United Nations Ebola coordinator Julien Harneis, dili na makasabay ang response operations tungod sa paspas nga pagkaylap sa maong outbreak.
Nanawagan si Harneis og dugang nga tabang tungod kay posibleng mahurot sulod sa pipila ka semana ang kasamtangang pondo sa organisasyon alang sa pagtubag sa epidemya.
Nalabwan sa kasamtangang outbreak kaniadtong ulahing bahin sa Hulyo ang kanhi pinakadakong Ebola outbreak sa Congo nga nahitabo gikan 2018 hangtod 2020, base sa gidaghanon sa mga kaso.
Gipahinabo ang outbreak sa Bundibugyo species sa Ebola, diin wala pay aprubadong bakuna o tambal alang niini.
Samtang, kapin 160 ka health workers na ang gikatahong natakdan ug 43 kanila ang namatay.
Nag atubang usab og peligro ang mga health worker tungod sa mga pag-atake sa pipila ka residente.
Subay sa rekord sa miaging unom ka bulan, kapin 260 ka insidente sa pag-atake batok sa health workers, diin adunay walo ang namatay.
Gibato ug gisunog ang pipila ka ambulansya, samtang giatake usab ang ubang health facilities tungod sa kahadlok ug kasuko sa mga katawhan.
Nagtuo usab ang pipila ka tawo nga hinimo-himo lamang ang outbreak tungod sa paglapnag sa sayop nga impormasyon.
Gipasidaan ni Harneis nga nakadugang sa problema ang pagkunhod sa humanitarian aid sa miaging mga tuig.
Naglisod usab ang mga awtoridad sa pagbayad sa pipila ka libo ka personnel nga nagtabang sa Ebola response tungod sa pagkaapekto sa banking services human gipahunong sa gobyerno ang commercial flights nga gigamit sa pagdala og cash ngadto sa mga bangko.
Nanawagan ang United Nations og dugang nga suporta aron mapalig-on ang medical response ug mapugngan ang padayon nga pagkaylap sa Ebola.
