Gipahinumdoman sa Philippine National Police ang mga personahe niini nga mahimong responsable sa pagtipig sa ilang mga armas, ilabina kung wala sila sa duty ug anaa sa ilang mga panimalay.
Matod ni PNP chief Gen. Jose Melencio Nartatez Jr., kinahanglan siguruhon nga luwas ug dili maabot sa mga bata ug ubang tawo ang mga service-issued firearms.
Mitumaw ang maong pahimangno human sa duha ka managlahing school shooting sulod sa halos duha ka bulan sa San Jose National High School sa Tacloban City ug Ateneo de Zamboanga University.
Sumala sa PNP, sa duha ka insidente, mga menor de edad ang giingong nakagamit sa service-issued firearms nga nakuha gikan sa ilang paryente kon ginikanan.
Lakip sa direktiba sa police commanders ang kanunay nga pagpahinumdom sa gun safety ug accountability atol sa unit briefings ug formations.
Sa pagkakaron, magdeploy usab ang PNP og personnel ug equipment alang sa nationwide school safety drills sa DepEd karong umalabot nga Martes, Agosto 25, 2026.
