Gibutyag ni kanhi Department of Public Works and Highways o DPWH Secretary Manuel Bonoan sa Sandiganbayan nga ang tanang senador nakadawat kuno og gitawag nga “leadership fund” gikan sa DPWH sugod niadtong 2024.
Matud ni Bonoan, gibanabana nga P500 million ang alokasyon matag senador, samtang mahimong moabot og P1 billion alang sa mga senador nga nangulo sa mga komite.
Sa iyang pahayag, miingon si Bonoan nga mikabat kuno og P24 billion ang maong pondo ug giingong anaa sa diskresyon kaniadto ni Senate President Juan Miguel Zubiri.
Gisulti usab ni Bonoan nga adunay mga senador nga nagsumite og listahan sa mga proyekto pinaagi sa ilang mga representante.
Gipangalanan niya sila Senators Bong Go ug Robin Padilla, samtang giingon usab niya nga nagpasalamat kaniya sila Padilla ug Sen. Imee Marcos alang sa iyang assistance.
Gisalikway ni Zubiri ang alegasyon ug miingon nga wala siya nangayo o naghupot og listahan sa mga proyekto gikan sa mga senador.
Gipatin-aw niya nga ang mga hangyo alang sa proyekto moagi sa Senate Committee on Finance ug dili sa iyang opisina.
Gisalikway usab ni Go ang alegasyon ug gihagit si Bonoan nga ipakita ang basihan sa iyang pahayag.
Samtang, miingon si Imee Marcos nga wala siya kahibalo sa giingong pasalamat nga gihisgutan ni Bonoan.
Padayon ang pagkuha sa Bombo Radyo sa reaksyon sa ubang senador nga nalambigit sa maong alegasyon. | VIA BOMBO EROS PAJOTA
