Wala pay extension sa oras sa liquor ban sa Davao City atol sa Kadayawan Festival 2026, matud sa Visibility, Regulation and Unit o VRU.
Sumala ni VRU Focal Person ug Smoking Cessation Counsellor Jalyn Pareja, nahisgutan na nila sa miaging mga miting uban sa mga bar owners ang ilang hangyo nga dugangan ang oras sa operasyon hangtod alas-2 sa kaadlawon imbes alas-1.
Apan giingon ni Pareja nga padayon pa ang pagrepaso sa amendment sa liquor code ug anti-smoking ordinance, lakip na ang posibilidad sa pag-usab sa oras o paghatag og special permit alang sa extension.
Sa pagkakaron, magpabilin ang kasamtangang lagda nga nagdili sa pagbaligya og ilimnong makahubog gikan alas-1 sa kaadlawon hangtod alas-8 sa buntag.
Bawal usab ang pag-serve og liquor sa mga bar gikan alas-2 sa kaadlawon.
Gipasabot sa VRU nga adunay special permit alang sa pipila ka establisemento, apan kinahanglan gihapon sundon ang mga probisyon sa kasamtangang ordinansa. | VIA BOMBO EROS PAJOTA
