Magbuot si Pangulong Ferdinand Marcos Jr. sulod sa mosunod nga duha ka semana kung aprobahan ba niya ang hangyo sa Estados Unidos nga ipa-extradite ngadto sa maong nasud si Pastor Apollo Quiboloy.
Gikumpirma sa Department of Foreign Affairs nga nadawat na niini ang extradition request sa gobyerno sa Amerika ug gipasa na ngadto sa Department of Justice alang sa tukmang pagtuon ug proseso.
Sumala kang Presidential Communications Office Undersecretary Claire Castro, nakigsulti na ang Malacañang kang Marcos ug gimando sa presidente nga susihon pag-ayo ang maong hangyo sa dili pa mohimo og desisyon.
Atubangon ni Quiboloy ang mga kaso sa Estados Unidos nga nalambigit sa giingong sex trafficking sa mga menor de edad, fraud ug bulk cash smuggling.
Sa Pilipinas, nag-atubang usab siya og mga kaso nga may kalabotan sa qualified human trafficking ug sexual abuse sa mga menor de edad.
Matud ni Castro, duha ang posibleng kapilian ubos sa extradition treaty tali sa Pilipinas ug Estados Unidos. Mahimong magpabilin si Quiboloy sa nasud samtang nag-atubang sa iyang mga kaso dinhi, o temporaryong suspindihon ang mga kaso ug ipadala siya sa Estados Unidos aron atubangon ang mga kaso didto.
Mipirma ang Pilipinas ug Estados Unidos sa extradition treaty niadtong Nobyembre 1994. | VIA BOMBO EROS PAJOTA
