Nagpahinumdom ang Department of Health (DOH) sa publiko batok sa leptospirosis taliwala sa padayong pag-ulan sa Pilipinas.
Girekomendar usab sa ahensya ang pagsul-ob og boots ug hustong proteksiyon sa lawas kung dili malikayan ang paglusong sa baha, lakip ang pagkonsulta sa doktor alang sa hustong tambag ug reseta sa tambal sama sa Doxycycline prophylaxis.
Mahimong motawag ang publiko sa National Emergency Hotline nga 911 kung nanginahanglan og agarang tabang.
Una nang gimandoan sa Palasyo Malacañang ang DOH nga maghimo og mga proaktibong lakang batok sa mga sakit nga mahimong makuha tungod sa pag-ulan ug pagbaha.
Gidasig usab sa pagamhanan ang mga mulabang sa tubig-baha nga mohimo sa tukmang mga lakang aron malikayan ang mga sakit nga mahimong makuha gikan sa baha ug magpakonsulta sa pinakaduol nga health center.
Matud ni Palace Press Officer Usec. Claire Castro, dili na angay hulaton nga mograbe ang mga sintomas sama sa hilanat, pagka-yellow sa mata o panit, ug uban pa, sa dili pa magpakonsulta sa doktor alang sa posibleng leptospirosis.
Gihimo sa Palasyo ang maong panawagan taliwala sa grabeng pagbaha sa Metro Manila ug ubang mga rehiyon tungod sa kusog nga pag ulan nga dala sa gipalig-on nga Hanging Habagat.
