Mibilib ang organizer sa National Bank Open sa Canada sa kusog sa suporta sa mga Pilipinong fans alang sa Pinoy tennis star nga si Alex Eala.
Sumala kang Karl Hale, tournament director sa WTA 1000 event, wala nila damha ang paspas nga pagkahurot sa mga ticket alang sa mga duwa ni Eala, ilabina sa iyang pag-atubang batok sa American player nga si Alycia Parks kaniadtong Huwebes, Agosto 6, 2026.
Sa maong duwa, nakadaog si Eala batok kang Parks pinaagi sa iskor nga 6-1, 4-6, ug 6-2 aron makasulod sa third round sa torneo.
Tungod sa kadaghan sa mga Pinoy supporters nga mitambong, nag-andam ang organizers og espesyal nga pagkaon nga “chicken adobo” sa food court sa Sobey’s Stadium nga adunay kapasidad nga 10,077 ka manan-aw.
Matud ni Hale, unang higayon kini nga nagdugang sila og espesyal nga pagkaon taliwala sa dagan sa torneo tungod lamang sa usa ka atleta.
Dugang pa niini, giila sa mga organizer nga ang mainit nga suporta kang Eala nagpakita sa kusog sa komunidad sa mga Pilipino sa Canada.
Sa pagkakaron, ang kalampusan ug pagka sikat ni Eala naghatag og bag-ong kabag-ohan sa National Bank Open, dili lamang isip usa ka kompetisyon sa tennis kondili usab isip pagpakita sa kultura ug suporta sa mga Pilipino.
