Nag-landfall na ang Tropical Storm Maymay sa lungsod sa Magsingal, Ilocos Sur karung Huwebes alas 2:00 sa buntag, sumala sa Philippine Atmospheric, Geophysical and Astronomical Services Administration (PAGASA).
Gidala sa bagyo ang kusog sa hangin nga moabot sa 65 kilometro matag oras duol sa sentro ug pagbugsong hangtod sa 110 kilometro matag oras samtang naglihok paingon sa sidlakan sa tulin nga 10 kilometro matag oras.
Gipadayag sa state weather bureau nga gilauman nga mohuyang ang Tropical Storm Maymay ug mahimong tropical depression karong buntag samtang motabok sa kayutaan, sa dili pa mahimong low-pressure area (LPA) sa hapon o gabii. Posible usab nga mas sayo pa kini mohuyang tungod sa kabukiran sa Luzon.
Nagpabilin usab nga gipataas ang Tropical Cyclone Wind Signal No. 2 sa Ilocos Norte, Ilocos Sur, dakong bahin sa La Union, amihanang-kasadpang Pangasinan, Abra, kasadpang Apayao, Kalinga, Mountain Province, amihanang-kasadpang Benguet, ug pipila ka bahin sa Cagayan.
Nagpadayon usab ang Tropical Cyclone Wind Signal No. 1 sa ubang bahin sa La Union, Pangasinan, Apayao, Kalinga, Mountain Province, Benguet, Ifugao, mainland Cagayan, Isabela, Quirino, Nueva Vizcaya, pipila ka bahin sa Zambales, Tarlac, Nueva Ecija, Aurora, ug habagatang bahin sa Babuyan Islands.
