Nadakpan ang lima ka Chinese nationals atol sa usa ka hiniusang operasyon sa Bureau of Immigration ug mga kaabag nga ahensya sa gobyerno sa Trento, Agusan del Sur, kaniadtong Agosto 3.
Sumala sa 10th Infantry “Agila” Division, gisuportahan sa 67th Infantry Battalion ang operasyon pinaagi sa paghatag og seguridad ug operational support samtang gipatuman sa Bureau of Immigration ang ilang law enforcement operation sulod sa Mayokada Enterprise sa Barangay Pulang Lupa.
Matud sa mga otoridad, ang lima ka langyawng Chinese nationals nadakpan tungod sa giingong mga kalapasan sa Immigration Laws sa Pilipinas, lakip ang misrepresentation, fraud, ug uban pang mga paglapas sa balaod.
Gipasiugda ni 10th Infantry Division Commander Major General Alvin Luzon nga nagpakita ang maong operasyon sa lig-on nga panaghiusa sa mga ahensya sa gobyerno sa pagpanalipod sa nasudnong seguridad ug pagpatuman sa balaod.
Sa pagkakaron, anaa na sa kustodiya sa Bureau of Immigration ang lima ka Chinese nationals alang sa dugang imbestigasyon ug pagpasaka sa angayng mga kaso.
