Mikusog isip Tropical Storm ang Bagyong Maymay (international name: Kujira) samtang nagalihok paingon sa habagatan-sidlakan sa kadagatan sa kasadpang bahin sa La Union, sumala sa pinakabag-ong weather bulletin sa PAGASA.
Namonitor ang sentro sa bagyo alas-3:00 sa kaadlawon karung Miyerkules, Agosto 5, 2026 sa 170 kilometro kasadpang bahin sa Bacnotan, La Union. Nagdala kini og maximum sustained winds nga 65 km/h ug paghaguros nga moabot sa 80 km/h.
Gipataas usab ang Tropical Cyclone Wind Signal (TCWS) No. 1 sa Ilocos Norte, Ilocos Sur, La Union, Pangasinan, Apayao, Abra, Kalinga, Mountain Province, Ifugao, Benguet, Cagayan, Isabela, Quirino, Nueva Vizcaya, amihanang bahin sa Zambales, amihanang bahin sa Tarlac, amihanang bahin sa Nueva Ecija, ug amihanang bahin sa Aurora.
Maagian sa ulan nga adunay kusog nga paghuros sa hangin ang Cagayan Valley, nahibiling bahin sa Ilocos Region ug Cordillera Administrative Region, ingon man ang Zambales, Tarlac, ug Nueva Ecija.
Makasinati usab og madag-umon nga kalangitan inubanan sa katag-katag nga ulan ug pagpanalugdog ang nahibiling bahin sa Central Luzon tungod gihapon sa Bagyong Maymay.
Gipalig-on usab sa Southwest Monsoon o Habagat ang pag-ulan sa Metro Manila, CALABARZON, Occidental ug Oriental Mindoro, Marinduque, Antique, Iloilo, ug Guimaras, nga adunay hulga sa pagbaha ug pagdahili sa yuta.
Gilauman sa ubang bahin sa nasud ang madag-umon nga kalangitan nga adunay scattered rainshowers tungod sa localized thunderstorms.
Padayon nga gimonitor sa PAGASA ang Typhoon Dolphin, nga anaa pa sa gawas sa Philippine Area of Responsibility (PAR). Alas-3:00 sa kaadlawon, nasiplatan kini 1,845 kilometro sa sidlakan-amihanan-sidlakan sa Extreme Northern Luzon, nga adunay maximum sustained winds nga 165 km/h, pagbugso hangtod 205 km/h, ug naglihok paingon sa kasadpan sa gikusgon nga 20 km/h.
