Mopakita karong adlawng Lunes, Agosto 3, 2026 ang duha ka auditors sa Commission on Audit (COA) isip mga testigo sa impeachment trial ni Vice President Sara Duterte.
Magpamatuod sila kanhi Intelligence and Confidential Funds Audit Office State Auditor Roderick Wamil ug Supervising Auditor Celine May Del Campo kabahin sa pag-audit sa confidential funds sa Office of the Vice President (OVP) ug Department of Education (DepEd).
Mosunod usab sa pagpamatuod si Director Marivic Pareja sa Legislative Information Resources Management Department sa House of Representatives.Nagkanayon si Lead Prosecutor Representative Gerville Luistro nga tutokan sa prosekusyon ang audit process ug ang mga nadiskobrehan sa COA, lakip ang mga Notice of Disallowance nga gipagawas may kalabotan sa giingong kuwestiyonableng paggasto sa confidential funds.
Nauna nang mipamatuod ang mga retiradong LandBank branch managers nga sila Violeta Constantino ug Nenita Camposano, nga naghatag og mga detalye sa pag-encash sa Treasury checks nga nagkantidad og ₱612.5 milyon alang sa OVP ug DepEd sa panahon nga si VP Sara pa ang kalihim sa maong departamento.
Giingon sa prosekusyon nga ang liquidation sa maong pondo adunay mga kuwestiyonableng acknowledgment receipts nga naglangkob sa mga ngalan sama nila “Mary Grace Piattos,” “Milky Secuya,” ug “Kokoy Villamin,” uban sa gatusan pa ka ubang ngalan nga giingong wala motakdo sa rekord sa Philippine Statistics Authority (PSA).
Gipadayag usab sa prosekusyon nga dali nga nagasto ang dako nga kantidad sa confidential funds, lakip ang ₱125 milyon nga giingong nahurot sulod lamang sa 11 ka adlaw, hinungdan nga nagpagawas ang COA og Notices of Disallowance aron ipabalik ang giingong kuwestiyonableng mga paggasto.
Gipasiugda ni House Prosecution Spokesperson ug Lanao del Sur Representative Zia Alonto Adiong nga ang confidential ug intelligence funds sakop gihapon sa audit sa COA ug dili mahimong gamiton nga walay tulubagon.
