Naghain si Quezon City Representative Jose Chaves Alvarez og House Resolution nga nagtinguha nga imbestigahan ang System Loss Charges nga makita sa mga bayronon sa kuryente aron masiguro kung patas, klaro, ug igo pa ba ang proteksiyon nga gihatag niini ngadto sa mga konsumidor.
Sumala pa kang Alvarez, gikinahanglan ang pagpatigayon og imbestigasyon ilabi na samtang adunay mga gisang-at nga mga sugyot nga nagtumong sa pagtangtang sa system loss charges sa electric bill. Dugang pa niini, ipatawag sa maong imbestigasyon ang Energy Regulatory Commission, mga transmission provider, distribution utilities, electric cooperatives, consumer groups, ug uban pang stakeholder aron ipasabot kung giunsa pagkalkula ang system loss charges ug kung nagsubay pa ba kini sa kasamtangang balaod.
Lakip sa susihon sa pagdungog sa Kongreso mao ang epekto sa maong bayronon ngadto sa mga konsumidor ug kung gikinahanglan ba ang pagpatuman og mga reporma aron mapalig-on ang proteksiyon sa publiko.Sa pagkakaron, gipasiugda ni Alvarez ang panginahanglan sa mas klaro ug transparent nga sistema sa pagkolekta sa bayronon samtang gipadayon ang kasaligan ug walay hunong nga suplay sa kuryente sa nasud.
