Gipadayag ni Senate Minority Leader Alan Peter Cayetano nga adunay mga politiko nga iyang gidayeg kaniadto apan lahi na ang iyang pagtan-aw kanila karon, lakip na si Senador Panfilo “Ping” Lacson.
Bisan pa niini, giingon ni Cayetano nga naglaom siya nga mobalik pa si Lacson sa iyang kanhing baruganan nga, matud pa niya, nagbarog alang sa kamatuoran ug hustisya.
Ang pahayag ni Cayetano misunod sa mga alegasyon ni Lacson nga adunay giingong mga iregularidad ug “ghost projects” sa mga flood control projects sa Taguig City.
Ang maong isyu nahimong hinungdan sa pagbinayloay og mga pahayag tali sa duha ka mga senador, ilabina kay ang Taguig usa sa mga lugar nga dugay nang nalambigit sa pamilyang Cayetano.
Sa pagkakaron, wala pa mopagawas og bag-ong tubag si Senador Lacson sa pinakabag-ong pahayag ni Cayetano.
