Gikuwestiyon ni kanhi House Speaker ug Leyte 1st District Representative Ferdinand Martin Romualdez ang pagkawalay pagpabor sa Office of the Ombudsman sa giingong imbestigasyon batok kaniya, tungod sa paggamit niini og mga testigo kansang kredibilidad una nang gikuwestiyon. Sumala pa kang Romualdez, ang iyang gikinahanglan lamang mao ang patas nga pagtratar ubos sa balaod.
Iyang giingon nga nagsalig kuno ang Ombudsman sa mga testigo nga kaniadto nang giila sa maong opisina ug sa Department of Justice (DOJ) nga dili kasaligan. Dugang pa niini, bisan wala niya hinganli ang mga testigo, iyang gipasabot nga kini adunay mga kasong cyberlibel ug perjury. Lakip sa iyang gihisgutan ang 18 ka kanhi bodyguard ni kanhi Ako Bicol Party-list Representative Zaldy Co, nga giingong pugante.
Bisan pa niini, gipahayag ni Romualdez nga dili siya moatras sa maong kaso ug magpadayon siyang moatubang sa tanang proseso sa imbestigasyon. Sa laing bahin, gipasalig ni Assistant Ombudsman Mico Clavano nga kasaligan ang mga testigong ilang ipresentar ug suportado sa mga ebidensya ang ilang mga pahayag. Matud pa ni Clavano, bisan adunay isyu sa joint affidavit sa 18 ka kanhi bodyguard, napamatud-an nga klaro ug nagkahiusa ang sulod sa ilang tagsa-tagsang affidavit, ilabina sa giingong cash deliveries nga giingong nalambigit sila Zaldy Co ug Martin Romualdez. Sa pagkakaron, nagpadayon ang proseso sa imbestigasyon sa maong kaso sa Office of the Ombudsman.
