Nag-organisa ang Department of Energy (DOE) og joint task force aron suportahan ang plano sa administrasyon nga tangtangon ang system loss charges ug value-added tax (VAT) sa bayronon sa kuryente sa mga konsumidor.
Matod sa DOE, gilangkuban ang task force sa Energy Regulatory Commission (ERC), National Electrification Administration (NEA), ug mga electric cooperative.
Tumong niini nga tun-an ug andamon ang mga regulasyon ug balaod nga gikinahanglan aron mapatuman ang direktiba ni Pangulong Ferdinand Marcos Jr.
Kahinumduman nga atol sa iyang State of the Nation Address (SONA), gihangyo sa Pangulo ang Kongreso nga usbon ang Electric Power Industry Reform Act (EPIRA) aron hingpit nga matangtang ang system loss charges ug ang kauban niini nga VAT sa electricity bill.
Matod sa DOE, ang maong mga reporma gitumong aron mopaubos sa bayranan sa kuryente, mapanalipdan ang mga konsumidor, ug mapaayo ang serbisyo sa sektor sa enerhiya.
Niadtong Hulyo 28, nakigpulong usab ang DOE sa Energy Regulatory Commission ug Manila Electric Company (Meralco) aron hisgutan ang mga lakang sa pagpatuman sa maong plano.
Bisan pa niini, nagpahayag ang Meralco og kaandam nga tun-an ang mga pagbag-o sa operasyon nga makatabang sa pagpaubos sa bayranan sa kuryente.
Giinsistir usab ni Meralco Chairman ug CEO Manuel V. Pangilinan nga kinahanglan hisgutan kung kinsa ang mosalo sa kantidad sa system loss charges kung hingpit na kining tangtangon, tungod kay posible kini moabot sa bilyon-bilyong piso.
