Nagtuo si Senador Rodante Marcoleta nga politikal ang kasong plunder nga giatubang niya ug giingong ang iyang pagkapriso gitumong aron mapugngan siya sa pagpadayag sa iyang nahibal-an kalabot sa ginaingong multi-milyong piso nga kontrobersiya sa mga flood control projects.
Matod ni Marcoleta, dili lang siya ang naapektuhan sa iyang pagkabilanggo kundili apil usab ang publiko nga gusto unta makabalo sa kamatuoran sa maong isyu.
Matud pa niya, adunay mga tawo nga wala pa mailhi nga responsable sa maong kontrobersiya ug kinahanglan unta silang manubag.
Si Marcoleta anaa karon sa kustodiya human giisyuhan og warrant of arrest sa Sandiganbayan sa kasong plunder nga gisang-at sa Office of the Ombudsman. Ang kaso naggikan sa ginaingong wala niya pagdeklara sa P75 milyon nga campaign donations atol sa 2025 nga eleksyon, lakip usab ang tulo ka kaso sa paglapas sa Presidential Decree No. 46 o balaod batok sa pagdawat og mga regalo sa mga opisyal sa gobyerno.
Niadtong Hulyo 22, mipasaka si Marcoleta og “not guilty” nga plea sa Sandiganbayan ug nagpadayon ang proseso sa iyang kaso. Gikatakda ang pre-trial sa kasong plunder sa Agosto 10 samtang padayon ang pagdungog sa korte.
