Gikabalakan karon ang posibilidad nga mosangpot sa mas halapad pang gubat ang pagkamatay sa mga sundalo sa Estados Unidos human sa mga pag-atake sa Iran sa mga U.S military base ngadto sa Jordan ug Iraq.
Gikumpirma sa United States military kaniadtong weekend nga usa sa ilang mga sundalo ang namatay sa pag-atake sa Iran sa northern Iraq, usa ka adlaw human sa pag-atake sa usa ka U.S. military base sa Jordan nga mipatay sa duha ka sundalong Amerikano ug nagbilin og usa pa ka service member nga wala gihapoy nakit-an.
Sumala sa U.S. Central Command (CENTCOM), usa ka indibidwal ang namatay atol sa usa ka “controlled detonation of unexploded ordnance” gikan sa usa ka Iranian attack drone nga ilang napukan, samtang usa pa ka service member ang naangol sa maong insidente.
Sa bag-ong update sa U.S. military, nakakaplag sila og usa ka wala pa mailhing patayng lawas atol sa search operations sa lugar diin nahitabo ang pag-atake sa Jordan. Nagpadayon pa karon ang examination process aron mapamatud-an ang identidad sa maong mga cadaver.
Nahitabo kini sa ikawalong adlaw sa nagkagrabeng komprontasyon tali sa Estados Unidos ug Iran. Samtang sa kinatibuk-an, misaka na sa 17 ang gidaghanon sa mga namatay sa kampo sa Estados Unidos, samtang miabot na sa 50 ang namatay ug kapin sa 500 ang nasamdan sa Iran sulod sa halos lima ka bulan nga panagsangka.
