Gipadayag ni Senate impeachment court spokesperson Regie Tongol nga posibleng sundon sa Senado ang legal nga proseso nga gigamit sa impeachment trial ni kanhi Chief Justice Renato Corona kaniadtong 2012 kung magpagawas kini og subpoena alang sa tax records ni Vice President Sara Duterte.
Sa usa ka press briefing, gipahayag ni Tongol nga giaprobahan na sa impeachment court ang hangyo sa House prosecution panel nga magpagawas og subpoena duces tecum ug subpoena ad testificandum batok sa mga opisyal sa Land Bank of the Philippines ug sa mga dokumentong may kalabotan sa Article I sa impeachment complaint, nga naghisgot sa giingong sayop nga paggamit o misappropriation sa confidential funds.
Nasayran nga ang pagpagawas sa subpoena himuon pinaagi sa ex parte proceedings, busa matod ni Tongol, walay basehan ang depensa aron pugngan ang pag-isyu niini.
Apan, mahimo gihapon nga mosukol ang kampo sa Bise Presidente sa maong subpoena panahon sa presentasyon sa ebidensya, pagsumite sa mga dokumento, o sa pagpangutana sa mga testigo.
Gipasabot usab ni Tongol nga mas komplikado ang isyu kon ang gipangayong mga dokumento mao ang bank records, tax records gikan sa Bureau of Internal Revenue (BIR), o mga report sa Anti-Money Laundering Council (AMLC) tungod kay sakop kini sa mga balaod sa bank secrecy, taxpayer confidentiality, privacy, ug uban pang legal nga limitasyon.
Dugang pa niya, nagkalainlain usab ang opinyon sa mga eksperto sa balaod kung mahimo bang kuwestiyunon sa Korte Suprema ang subpoena nga ipagawas sa impeachment court.
Apan adunay nagtuo nga ang Senado, adunay eksklusibong gahum sa pagdungog ug paghusay sa mga impeachment case, busa dili dayon mahimong panghilabtan sa Supreme Court ang mga interlocutory orders niini.
