Gi-transfer o gipabalhin na sa Bureau of Corrections (BuCor) ang 600 ka persons deprived of liberty (PDLs) ngadto sa Davao Prison and Penal Farm sa Davao del Norte kaniadtong Hulyo 8, 2026 isip kabahin sa ilang pagpangandam sa planong pagsira sa New Bilibid Prison sa Muntinlupa.
Gilangkoban kini sa 500 ka PDL gikan sa New Bilibid Prison ug 100 ka babayeng PDL gikan sa Correctional Institution for Women.
Gipahayag ni BuCor Director General Gregorio Pio Catapang Jr. nga kabahin kini sa paningkamot sa ahensya aron maminusan ang kadaghan sa mga PDL sa NBP, nga dugay nang nag-atubang og grabe nga overcrowding.
Ang maong lakang nahiuyon usab sa pagpangandam sa BuCor alang sa umaabot nga pagsira sa New Bilibid Prison.
Gisuguro usab nga hapsay ang pagbalhin sa mga PDL samtang gipadayon ang seguridad sa matag transfer operation.
Gi-eskortan ang mga PDL sa 150 ka correctional personnel aron masiguro ang luwas ug organisadong pagbalhin ngadto sa bag-ong pasilidad.
Sa pagka karun, hapit na sa 16,000 ka PDL ang ilang na-transfer gikan sa NBP ngadto sa nagkalain-laing prisohan ug penal farms sa nasud.
Gipahibalo sa ahensya nga human sa pagsira sa NBP, ilang planong ipa-abang ang mixed-use property diin nahimutang ang prisohan aron mapalapad pa ang paggamit niini ug makahatag og dugang kita alang sa modernisasyon sa correctional system.
