Nakasiguro ang Pilipinas og kapin US$2.5 bilyon nga mga investment commitments gikan sa nagkalainlaing kompanya sa Canada sa mga sektor sa pagmina, enerhiya, information technology (IT), business process management (BPM), ug digital economy, atol sa opisyal nga pagbisita ni Pangulong Ferdinand Marcos Jr. sa maong nasod.
Sumala pa sa Pangulo, dako kining tabang aron mas mapadali ang pagtubo sa ekonomiya sa Pilipinas ug makahimo og dugang nga oportunidad alang sa mga Pilipino. Atol sa iyang official visit sa Canada, nakigpulong siya sa mga dagkong Canadian companies nga mipadayag sa ilang interes nga mamuhunan sa nasod.
Dugang pa niini, gipahayag ni Pangulong Marcos nga malampuson ang maong biyahe tungod kay adunay mga inisyatibong nasabutan tali sa gobyerno ug pribadong sektor nga gilauman nga makapadasig pa sa kalamboan sa ekonomiya.
Lakip sa iyang gipasiugda, giingon sa Punong Ehekutibo nga dili pa kutob sa maong mga kasabutan ang trabaho sa gobyerno, kundili magpadayon kini sa paningkamot aron masiguro nga ang mga proyekto ug kasabotan nga nasugdan sa Canada mamunga ug mapahimuslan sa mas daghang Pilipino.
Sa kasamtangan, nagpadayon usab ang negosasyon tali sa Pilipinas ug Canada alang sa posibleng Philippines-Canada Free Trade Agreement, nga gilauman nga makapalig-on pa sa relasyon sa pamatigayon ug makadani og dugang pamuhunan sa duha ka nasod.
Gihisgutan usab atol sa pagbisita ang posibilidad sa pagtukod og artificial intelligence (AI) hubs ug mga training centers sa Pilipinas aron mapalambo ang kahibalo ug kahanas sa mga Pilipino sa AI ug digital technologies.
Dugang pa, gidayeg usab ni Pangulong Marcos ang padayon nga suporta sa Canada sa rules-based international order ug sa United Nations Convention on the Law of the Sea (UNCLOS), ilabina sa mga isyu nga may kalabotan sa South China Sea.
Kahinumduman, mipahibalo na kaniadto si Pangulong Marcos nga opisyal nang gipataas ngadto sa strategic partnership ang relasyon tali sa Pilipinas ug Canada human sa iyang official visit. Lakip sa mga nasabutan ang mas lawom nga kooperasyon sa seguridad, pamatigayon, enerhiya, teknolohiya, ug uban pang mga sektor, uban ni Canadian Prime Minister Mark Carney, mga opisyal, ug mga negosyante sa Canada.
