Gibarugan ni Senate President Sherwin Gatchalian nga siya gihapon ang angay mangulo sa impeachment trial ni Vice President Sara Duterte, subay sa Senate Rules of Procedure on Impeachment Trials.
Sa usa ka interbyu, iyang gipasabot nga sumala sa mga lagda sa Senado, ang Senate President ang mahimong presiding officer sa tanang impeachment trial gawas lamang kung ang gitaral mao ang Presidente sa nasud.
Apan, giila usab niya nga adunay probisyon sa giusab nga impeachment rules nga nagtugot sa mga senator-judges sa pagbotar kung gusto nilang magtudlo og laing presiding officer.
Matud pa ni Gatchalian, kon mao kana ang desisyon sa kadaghanan, andam siyang motuman sa hukom sa Senado.
Gipasalig usab sa Senate President nga andam na ang Senado alang sa pagsugod sa impeachment trial sa Lunes, lakip na ang security preparations ug contingency plans sama sa backup power supply aron malikayan ang bisan unsang pagkaantala sa pagdungog.
Gipaabot usab niyang motambong ang tanang senador sa pag-abli sa pagtaral, lakip si Senate Minority Leader Alan Peter Cayetano, bisan pa nga posibilidad nga adunay pipila ka senador nga dili makatambong personal tungod sa ilang giatubang nga mga kaso.
Samtang, midumili una si Gatchalian sa pagkomento kung kinahanglan bang usbon ang gidaghanon sa mga boto nga gikinahanglan alang sa paghukom, ug giingong dili pa kini apil sa hisgutan sa unang adlaw sa impeachment trial.
