Misaka na sa 2,025 ang gitawag nga excess deaths sa France tungod sa grabeng heatwave nga miigo sa Europa sukad sa ulahing semana sa Hunyo ning tuiga, sumala sa mga public health officials.
Mikabat kini og 30 porsiyento nga pagtaas kumpara sa miaging semana. Matud ni French Health Minister Stéphanie Rist, kadaghanan sa mga namatay anaa sa edad 45 anyos pataas.
Kahinumdoman usab nga kaniadtong Hunyo 24,2026 natala sa France ang pinakainit nga adlaw sa kasaysayan sa nasud diin miabot sa hapit 41°C ang temperatura sa Paris, samtang gipailalom sa red heat alert ang katunga sa nasud.
Gilauman nga musaka pag-usab sa 40°C ang temperatura sa habagatang bahin sa France, samtang nagpagawas ang gobyerno og red alert tungod sa hulga sa mga forest fire.
Base sa datos, kapin 7,000 na ka sunog ang natala sukad nagsugod ang ting-init nga mitupok sa mga 8,700 ektarya nga yuta, ug mihikling usab ang liboan ka residente tungod sa nagkalapad nga wildfire.
Samtang, miabot sa 1,222 ang excess deaths sa Belgium, o 39 porsiyento nga mas taas, diin halos katunga sa mga namatay nagpangedaron og edad 85 anyos pataas.
Sa Netherlands, gikataho sa mga awtoridad ang mga 480 ka excess deaths sa miaging semana, kasagaran mga senior citizen nga 80 anyos pataas, human miabot sa hapit 40°C ang temperatura sa pipila ka bahin sa nasud.
Sumala sa Copernicus Climate Change Service, ang Europa mao ang pinakapaspas mo-init nga kontinente sa kalibotan, nga nagpainit sa doble nga tulin kung itandi sa global average, hinungdan sa mas grabe ang heatwave, kakulang sa suplay sa tubig, ug mga wildfire.
