Gi-archive o gipabiling pending sa Sandiganbayan 7th Division ang kasong graft batok sa kanhi kongresistang si Elizaldy “Zaldy” Co. Gibuhat kini human molabay og kapin unom ka bulan sukad nagpagawas ang korte og warrant of arrest apan hangtod karon wala gihapon madakpan sa mga awtoridad si Co. Una nang gibalik sa National Bureau of Investigation (NBI) ang Return of Warrant human mapakyas ang ilang operasyon sa pagpangita kang Co sa mga address nga gilatid sa iyang warrant of arrest.
Gipasabot sa Integrated Bar of the Philippines (IBP) nga ang pag-archive sa kaso usa lamang ka normal nga pamaagi sa korte ug dili kini nagpasabot nga gibasura na ang kaso. Matud pa sa IBP, gihimo kini aron dili maapektuhan ang mga iskedyul sa korte samtang wala pa nadakpan ang akusado.
Nag-atubang si Co og kasong graft sa giingong iregularidad sa ₱289-milyones nga flood control project sa Oriental Mindoro.Gikonektar usab siya sa Office of the Ombudsman sa Sunwest Incorporated, nga usa sa mga contractor sa maong proyekto.
Sumala sa IBP, magpabiling pending ang kaso ug dayon kining ipadayon sa korte sa higayon nga madakpan o boluntaryong motahan ang kanhing kongresista.
Tungod kay giisip na siyang pugante o takas sa balaod, magpabiling balido ang kaso bisan pa og maglikay-likay siya sa mga awtoridad.
Sa pinakaulahing impormasyon sa gobyerno, gituohang anaa karon si Co sa France ug nakahangyo na og asylum didto. Samtang, gikanayon ni Interior Secretary Jonvic Remulla nga girepaso pa sa gobyerno ang resolusyon nga gipagawas sa Sandiganbayan.
