Wala mokumpirma ni mohimakak ang Philippine National Police (PNP) sa alegasyon ni Sen. Rodante Marcoleta nga nakadawat siya og impormasyon kabahin sa giingong arrest warrant nga posibleng ipagula batok kaniya.
Gipadayag ni PNP PIO Chief PCol. Allen Rae Co nga dili mokumpirma o mohimakak ang PNP sa paglungtad sa mga warrant batok sa bisan kinsang indibidwal tungod kay anaa kini sa eksklusibong hurisdiksyon sa mga korte.
Matud pa ni PCol. Co, ang ilang masiguro lamang mao nga ilang ipatuman ang bisan unsang warrant nga ipagula sa usa ka adunay katungod nga korte pinaagi sa hustong legal nga proseso ug subay sa balaod.
Samtang, giingon ni Interior Secretary Jonvic Remulla nga kinahanglan una adunay kasong ikasang-at sa Sandiganbayan sa dili pa mahimong makapagula og warrant of arrest. Dugang pa niini, wala siya mahibalo nga adunay kasong nahain batok kang Sen. Marcoleta sa pagkakaron.
Kahinumduman nga niadtong Biyernes, gipadayag ni Sen. Marcoleta nga dili siya mosukol sakaling dakpon siya sa mga otoridad human niya madunggan ang impormasyon nga adunay posibleng warrant nga ipagula batok kaniya kalabot sa mga reklamong plunder ug indirect bribery.
Ang maong mga reklamo may kalabutan sa giingong wala niya pagdeklara sa campaign funds nga gikatahong gikan kang kanhing Quezon City Rep. Mike Defensor ug mga negosyanteng sila Joseph Espiritu ug Aristotle Viray.
Matud pa sa senador, andam siyang mouban sa mga arresting officer sa malinawon nga paagi tungod kay nasabtan niya ang legal nga proseso sa pagdakop. Iyang giingon nga wala siya mahibalo sa bisan unsang balaod nga iyang nalapas ug giingong peke lamang ang mga reklamong gipasaka batok kaniya.
Sa kasamtangan, nagpadayon ang diskusyon kabahin sa maong mga alegasyon samtang wala pa adunay opisyal nga kumpirmasyon gikan sa korte mahitungod sa giingong warrant of arrest.
