Posibleng maimbestigahan si Davao City Mayor Sebastian “Baste” Duterte ug ubang mga opisyal sa syudad tungod sa giingong administratibong kapakyasan human sa pagmando sa paglabay og basura atubangan sa opisina sa Department of Environment and Natural Resources o DENR Regional Office sa Davao City.
Sumala kang Palace Press Officer Claire Castro, maglusad ang Department of the Interior and Local Government o DILG og lawom nga imbestigasyon aron masuta kon adunay nahitabong pagpasagad o paglapas sa mga balaod sa kinaiyahan nga nalambigit sa aksyon sa lokal nga panggamhanan.
Matud ni Castro, gipasalig ni Interior Secretary Jonvic Remulla nga patas ang pag-imbestiga sa maong insidente.
Dugang pa niya, dili nila unhan ang bisan unsang aksyon nga himuon ni Secretary Remulla, apan sigurado nga adunay imbestigasyon nga ipahigayon.
Gipasabot usab niini nga ang posibleng administratibong silot magdepende sa kabug-aton sa mapamatud-ang paglapas ug mahimong moresulta sa reprimand, suspensyon o bisan pagtangtang sa pwesto.
Ubos sa Local Government Code of 1991, ang mga administratibong reklamo batok sa mayor sa usa ka highly urbanized city sama sa Davao City paminawon ug desisyunan sa Buhatan sa Presidente.
Mahimo usab nga ipatuman ang preventive suspension nga dili molapas og 60 ka adlaw kon adunay lig-on nga ebidensya ug kon ang pagpabilin sa opisyal sa pwesto mahimong makaapekto sa mga testigo o ebidensya.
Nanawagan usab si Castro sa mga opisyal sa lokal nga panggamhanan nga unahon ang kaayohan sa katawhan.
