Nitambong ang kapin 500 ka Agrarian Reform Beneficiaries kon ARBs sa gihimong rally ug general assembly sa San Isidro Libertad San Remegio Comprehensive Agrarian Reform Beneficiaries Multipurpose Cooperative (SLS CARBMCO) didto sa Kaputian, Island Garden City of Samal niadtong Biyernes sa buntag, Mayo 29, 2026.
Sumala pa sa tigpamab ug usa sa mga Board of Director nga si Pepito Mantos Jr., gihimo ang maong pagtigom aron ipaklaro ug ipasabot ang mga isyu nga gipakaylap sa social media nga naglambigit sa pipila ka pamilya nga kabahin sa Agrarian Reform Beneficiaries nga supak sa pagbahin-bahin sa yuta.
Lakip sa gihisgutan sa asembliya mao ang 740 ka ektarya nga yuta sa kooperatiba, diin 250 ka ektarya niini gi-aprobahan pinaagi sa resolusyon nga ibaligya ug paarkilahan, ug ang mga miyembro lamang nga nagpuyo sa lugar ang makabenepisyo kung mahuman ang transaksyon.
Samtang sa laing bahin, nanawagan si Mantos kang Davao del Norte Board Member Orly Amit nga likayan ang pagpanghilabot kung wala pa’y sakto nga kasayuran sa tinuod nga kahimtang sa kooperatiba.
Kinahanglan sumala pa nga susihon una sa opisyal ang tibuok sitwasyon kabahin sa nahitabong bangi sa nasampit nga mga luna aron masayran ang kamatuoran.
Samatang gihangyo usab si ML Representative Leila De Lima nga susihon una ang tinuod nga sitwasyon ayha mopabor o modapig sa usa lamang ka kampo, aron malikayan ang sayop nga interpretasyon sa nasampit nga isyu diin gibarugan sa kooperatiba nga nahisubay sa balaod og saktong proseso ang ilahang pagdumala sa kooperatiba nga giuyunan sa kadaghanang myembro batok sa pito lamang ka mga indibidwal nga mi-alkontra tungod sa ilahang kaugalingong baruganan.
