Gibutyag sa Department of Social Welfare and Development (DSWD) nga miabot na sa P117 milyon ang kantidad sa ayuda nga gipang apod-apod sa mga pamilyang naapektuhan sa padayong pag-alboroto sa Bulkang Mayon sa probinsya sa Albay. Sumala sa DSWD, lakip sa gipanghatag ang kapin 71,000 ka family food packs, libo-an ka non-food items, ug ready-to-eat food packs alang sa mga evacuees.
Dugang pa niini, naghatag usab ang ahensya og cash-for-work assistance sa kapin 3,400 ka benepisyaryo, lakip na ang mga mag-uuma nga nawad-an og panginabuhian tungod sa volcanic activity. Lakip sa mga lakang, nagpatuman usab ang DSWD og emergency cash transfer nga kapin ₱10,000 matag pamilya aron matubag ang uban pang daliang panginahanglan sa mga internally displaced persons o IDPs.
Sa kasamtangan, kapin 1,400 ka pamilya ang nagpabilin sa 14 ka evacuation centers sa Albay, samtang padayon ang koordinasyon sa DSWD uban sa lokal nga panggamhanan aron masiguro ang maayong kahimtang sa mga evacuation site. Sumala sa PHIVOLCS, padayon ang aktibidad sa Mayon Volcano lakip ang ash emissions ug pyroclastic density currents nga resulta sa paghugno sa lava.
