Gisugdan na sa House Committee on Justice ang pormal nga imbestigasyon kabahin sa impeachment complaint batok kang VP Sara Duterte, human sa wala pag-isyu og temporary restraining order (TRO) sa Korte Suprema aron mapugngan ang proseso.
Sumala pa ni House Committee on Public Accounts Chair ug Bicol Saro Party-list Representative Terry Ridon, andam na ang tanan nga preparasyon alang sa pagpadayon sa hearing sa komite. Dugang pa niini, gipadayag sa kongresista nga nakapila na ang mga importanteng testigo nga ipresentar sa imbestigasyon, lakip ang usa ka Ramil Madriaga nga giingong bagman sa bise presidente.
Bisan pa og nagpadayon ang proseso, gipatin-aw ni Ridon nga ang kasamtangang hugna usa pa lamang ka preliminary investigation ug dili pa pormal nga trial. Sumala sa kongresista, ang Kamara de Representantes nagatuman lamang sa ilang mandato sa Konstitusyon nga susihon kung adunay probable cause aron iendorso ang kaso sa Senado.
Lakip sa mga ipatawag nga testigo mao ang mga opisyal sa gobyerno, abogado, ug uban pang resource persons nga adunay kalabutan sa mga alegasyon. Sa kasamtangan, ang mga testigo gikinahanglan nga magsumite og sinumpaang salaysay ug mga dokumento nga magsilbing ebidensya sa imbestigasyon.
Gikanayon usab ni Ridon nga ang kredibilidad sa matag testigo pagahimoon og hugot nga pagbusisi aron masiguro ang patas nga proseso.Dugang pa niini, ang tanang testimonya ipailawom sa panumpa aron masiguro nga ang mga pahayag nakabase sa kamatuoran ug suportado sa lig-on nga ebidensya.
