Nagpasaka na og reklamong cyber libel si Agriculture Secretary Francisco Tiu-Laurel Jr. sa Makati City Prosecutor’s Office batok nila Atty. Levi Baligod ug kanhi Ako Bicol Party-list Representative Zaldy Co.
Sumala sa kalihim, kini may kalabotan sa gikaingong sayop nga paglambigit kaniya sa isyu sa “male-maletang” kwarta nga kuno gihatag sa pipila ka mga indibidwal.
Kahinumduman usab nga kaniadtong nakalabay nga tuig gibutyag ni Co nga nalambigit sumala pa ang Department of Agriculture sa mga alegasyon sa anomalya sa importasyon sa bugas, sibuyas, asukar ug isda.
Apan hugot kini nga gilimod ni Tiu-Laurel ang mga akusasyon ug giingong walay basihan.
Matod pa ni Sec.Tiu-Laurel, ang pagpasaka sa kaso kabahin kini sa iyahang pagpanalipod sa iyang reputasyon ug aron masiguro nga dili malimbongan ang publiko sa sayop nga impormasyon kalabot sa sektor sa agrikultura.
Samtang, base sa datos sa Department of Justice, misaka og 18% ang ihap sa mga kasong cyberlibel gikan 2024 hangtod 2025, nga kasagaran may kalabotan sa mga opisyal sa gobyerno ug mga pahayag sa digital platform.
