Gipasayon ug gipadali karon sa Senado ang lakang sa pagpasa sa Senate Bill No. 1625 o mas nailhan nga West Philippine Sea (WPS) Education Act, usa ka panukala nga nagtumong nga mahimong kabahin sa pormal nga edukasyon ang pagtuon sa mga teritoryong pandagat sa Pilipinas.
Sumala kang Senate Committee on Foreign Relations Chairman Erwin Tulfo, dako pa gihapon ang kakulangan sa kahibalo sa daghang Pilipino bahin sa West Philippine Sea ug uban pang sakop nga dagat sa nasud. Tungod niini, giingon niya nga importante nga masugdan na kini sa eskwelahan aron sayo pa lang masabtan sa mga estudyante ang tinuod nga kahimtang ug katungod sa Pilipinas.
Sa ilawom sa panukalang balaod, ipasulod sa kurikulum sa elementarya, hayskul, ug kolehiyo ang mga leksyon nga angay sa edad sa magtutun-an. Lakip sa mga itudlo ang internasyonal nga giila nga mga kamatuoran, mga desisyon sa Korte Suprema, ug mga balaod nga may kalabotan sa West Philippine Sea ug soberanya sa nasud.
Dili lang eskwelahan ang maapil sa programa. Magtinabangay ang Department of Education (DepEd), Commission on Higher Education (CHED), National Mapping and Resource Information Authority (NAMRIA), National Security Council (NSC), Department of Foreign Affairs (DFA), ug uban pang ahensya sa gobyerno sa paghimo sa leksyon ug mga materyales sa pagtudlo.
Kung mahimong balaod na kini, obligasyon sa DepEd ang paghatag og husto nga pagbansay sa mga magtutudlo nga motudlo sa WPS Education. Tumong niini nga masaligan ug klaro ang impormasyon nga mahatag sa mga estudyante sa tanang lebel.
Gidani usab sa panukala ang mga State Universities and Colleges o SUCs nga palawmon ang panukiduki bahin sa maritime security, coastal communities, ug pagdumala sa kadagatan. Pinaagi niini, gilauman nga mas lig-on ang kahibalo sa nasudnon nga interes ug mas malinaw ang baruganan sa Pilipinas sa isyu sa West Philippine Sea.
Alang sa mga nagsuporta sa balaod, ang WPS Education Act dili lang bahin sa leksyon sa klase, kondili usa ka paagi sa pagpanalipod sa kasaysayan, katungod, ug kaugmaon sa nasud pinaagi sa kahibalo.
