Mipahimangno pag-usab ang Integrated Gender and Development Division (IGDD) sa katawhan nga hugot ug klaro ang balaod batok sa tanang porma sa pagpangbastos sa pampublikong lugar, eskwelahan, ug bisan sa online platforms, subay sa ginapatuman nga Safe Spaces Act o Republic Act 11313.
Sumala sa IGDD, gitumong sa maong balaod ang pagpanalipod sa dignidad ug kahilwasan sa matag indibidwal, ilabina sa mga babaye ug miyembro sa LGBTQ+ community nga kasagaran maoy biktima sa verbal, pisikal, ug digital nga harassment. Apil sa mga ginadumili nga binuhatan ang catcalling, pamalikas nga may seksuwal nga kahulugan, bastos nga binuang, sexual jokes, ug dili gusto nga mga imbitasyon.
Matud ni Reina Grace Ureta, Development Officer I sa IGDD, ang unang paglapas o first degree offense silotan og multa nga ₱1,000, 12 ka oras nga community service, ug obligadong moagi sa gender sensitivity training. Kon masubli ang paglapas, mosaka ang silot lakip na ang mas bug-at nga multa ug posible nga pagkabilanggo.
Gipatin-aw usab sa buhatan nga ang ikaduhang lebel sa paglapas naglangkob sa pagpakita og malaswa o bastos nga mga lihok, samtang ang ikatulong lebel naglakip sa stalking, pamugos nga pagdool, ug pisikal nga pagpangharas. Ang maong mga binuhatan mahimong mosangpot sa prisong moabot og unom ka bulan ug multa nga mahimo’g mulapas sa ₱100,000, depende sa kabug-aton ug kasubsob sa sala.
Gina-awhag sa IGDD ang publiko nga dili mahadlok mo-report sa tanang insidente sa pagpangbastos ug mangayo og tabang sa hustong buhatan. Tumong sa kampanya ang paghimo og luwas, matinahuron, ug patas nga mga espasyo alang sa tanan, diin walay lugar ang kahadlok, pagpaubos, ug pang-abuso.
