Giisyuhan og Show Cause Order sa Land Transportation Franchising and Regulatory Board Region XI (LTFRB XI) ang usa ka 54-anyos nga taxi driver sa Davao City nga nag-viral sa social media human giingong namastos ug nagpagawas og malaw-ay nga estorya batok sa iyang babaeng pasahero nga usa ka estudyante.
Gibutyag ni LTFRB XI Legal Section Assistant Atty. Deanne Aburey Salcedo nga gitawag na ang operator sa taxi aron mohatag og tubag ug pasabot kabahin sa giingong dili maayong pamatasan sa drayber, lakip ang paghisgot sa sensitibong mga hisgutanaan ug pagpanulti og malaw-ay nga mga pulong sa pasahero.
Dugang pa, human mi-viral ang video ug nakadawat og daghang reports, tags ug mentions, gilayon kining gi-verify sa buhatan aron matagan og hustong aksyon.
Gikatakda nga ipahigayon ang hearing karong umaabot nga Lunes, Enero 26, 2026, alang sa ebalwasyon sa kaso, ug kon mapamatud-an ang alegasyon, pagahamtangan og tukmang silot ug penalty ang drayber.
Miangkon usab ang suspek nga nangayo na siya og pasaylo ug igo lamang sumala pa siya mipatol sa istorya sa babae.
Samtang gibutyag usab niini nga dili menor de edad ang pasahero ug mitubay lamang siya sa estorya.
Gipaabot sa LTFRB XI nga masayran sa umaabot nga hearing ang posibleng kaso nga ipasaka batok sa drayber base sa resulta sa imbestigasyon ug testimonya sa mga nalambigit.
