Mitapos na opisyal ang search and rescue operations sa Binaliw Landfill sa Cebu City human marekober sa mga otoridad ang katapusang patay’ng lawas sa landslide nga nahitabo niadtong Enero 8, nga misangpot sa pagtaas sa ihap sa mga namatay ngadto sa 36 ka indibidwal.
Sumala sa Cebu City Disaster Response Committee, narekober ang katapusang lawas sayo sa buntag adlaw’ng Domingo, Enero 18, nga nagpasabot nga tanang mga gitaho nga nawawala may kalabotan sa insidente nahibal-an na ang kahimtang. Giila sa mga awtoridad nga usa kini ka hinungdanong lakang aron makahatag og kahupayan, bisan gamay, sa mga pamilyang nagpaabot og balita sa ilang mahal sa kinabuhi.
Sa pinakabag-ong datos, 14 ka biktima ang nagpabiling confined sa ospital tungod sa nagkalain-laing samad nga ilang naangkon atol sa landslide, samtang upat na ang gipapahawa ug gipauli na balik sa ilang mga panimalay human mahatagan og tukmang tambal ug medikal nga pag-atiman.
Miingon ang lokal nga kagamhanan nga ang pagtapos sa rescue operations dili pa nagpasabot sa katapusan sa responsibilidad sa gobyerno. Padayon pa ang post-disaster response, lakip ang psychosocial support sa mga pamilya sa biktima, assessment sa kaluwasan sa landfill, ug pagrepaso sa mga polisiya aron malikayan ang susamang trahedya sa umaabot.
Niadtong Biyernes, nagtapok ang mga paryente ug higala sa mga nabiktima aron handumon ang ilang mga mahal sa kinabuhi pinaagi sa mga kandila ug pag-ampo. Ang maong kalihokan nahitabo dungan sa pagdeklara sa State of Calamity sa apektadong lugar, nga nagtugot sa lokal nga kagamhanan nga dali nga magpagawas og pondo ug dugang nga tabang alang sa mga biktima.
