-- ADVERTISEMENT --

Gikondena ni Barangay Lasang Punong Barangay Allan P. Simo-ag ang duha ka sunod-sunod nga gikatahong kagubot nga nalambigit sa mga kabatan-onan sa maong barangay niadtong Nobyembre 18 ug 19, 2026, ug nanawagan sa mga ginikanan ug residente nga tabangan ang pagpanalipod sa kalinaw ug kaluwasan sa mga estudyante.

Base sa mga report, ang unang insidente nahitabo niadtong Nobyembre 18, mga alas 12:30 sa udto, diin nalambigit ang mga estudyante ug mga kabatan-onan nga wala na nag-eskwela, lumulupyo man o dili sa Barangay Lasang, lakip ang mga estudyante sa usa ka tunghaan sa maong lugar.

Samtang, laing grupo nga gilangkoban sa walo ka indibidwal ang gikatahong misulay pagpahinabo og kagubot sa Purok Leo niadtong Nobyembre 19, mga alas 2:27 sa hapon. Lakip sa maong grupo ang mga kabatan-onan nga wala na nag-eskwela ug mga estudyante gikan sa nagkadaiyang tunghaan ug lugar.

Atol sa iyang Facebook Live niadtong Nobyembre 19, gipasiugda ni Simo-ag nga dili angay pasagdan ang maong mga pamatasan tungod kay nagbutang kini sa peligro sa mga kabatan-onan, ilabina sa mga estudyanteng mosulod lamang sa eskwelahan aron magtuon.

Gihangyo usab niya ang mga ginikanan nga hatagan og saktong paggiya ug pagdumala ang ilang mga anak, samtang giawhag ang mga residente nga magmatngon ug motabang sa pagmonitor sa palibot sa mga eskwelahan ug mga purok, ilabina panahon sa klase.

-- ADVERTISEMENT --

Gipasabot sa punong barangay nga ang matag report aksyonan pinaagi sa hustong pagseguro sa mga nalambigit, pagpangutana sa mga hingtungdan ug pagpakig-alayon sa ilang mga ginikanan, eskwelahan ug Bunawan Police Station, subay sa angay nga proseso.

Gipasiugda ni Simo-ag nga dili lamang responsibilidad sa barangay ang pagpanalipod sa kabatan-onan, kondili nagkinahanglan usab kini sa hiniusang paningkamot sa mga ginikanan, eskwelahan, residente ug tibuok komunidad aron mapadayon ang kalinaw ug kaluwasan sa Barangay Lasang.