Gikuwestiyon sa kampo sa negosyanteng si Charlie ‘Atong’ Ang ang mando sa korte nga gi-isyu bahin sa kaso nga iyang giatubang mahitungod sa pagkawala sa mga sabangero.
Sa usa ka opisyal nga pahayag sa iyang abogado nga si Atty. Gabriel Villareal, nga iyang giisip nga ‘premature’ ang desisyon sa Sta. Cruz, Laguna Regional Trial Court Branch 26.
Kahinumduman nga kagahapon, opisyal nga gi-isyu ang ‘warrant of arrest’ batok kang Atong Ang sa kaso nga ‘kidnapping with homicide’.
Bisan paman niini, nagtuo ang iyang legal counsel nga ang mando sa nahisgutang korte usa ka paglapas sa katungod sa iyang kliyente sa ‘due process’.
Gibarugan ni Atty. Villareal nga ang ‘arrest order’ ‘legal nga kuwestiyonable’ tungod kay matod niya wala kini makatuman sa mga giya sa konstitusyon nga kinahanglan sundon kabahin sa maong sitwasyon.
Dugang pa niya nga ang aksyon sa huwes gi-base lamang sa dili kompleto ug one-sided nga impormasyon nga gihatag sa Department of Justice sa pagtino kung aduna bay ‘probable cause’ sa kaso.
Dugang pa sa abogado, wala gitan-aw sa korte ang mga counter affidavit ug ebidensya gikan sa mga akusado lakip na si Atong Ang. Bisan pa niini, gipaambit ni Atty. Villareal nga motuman gihapon sila sa legal nga proseso sa korte ug mag-andam sa mga remedyo nga mahimong himuon ug ipasaka.
Samtang gikanayon usab niini nga ilahang buhaton ang tanan aron mahatagan ang kliyente niini nga si Atong Ang og higayon nga hagiton ang gipagawas nga ‘arrest order’.
Samtang ang ‘arrest warrant’ nga gi-isyu sa Regional Trial Court sa Sta. Cruz, Laguna nagbutyag nga ang mga otoridad kinahanglan mosunod sa balaod isip husto ug legal nga pamaagi sa pagpatuman sa mando batok sa mga ‘respondent’ kon akusado sa kaso.
Kahinumduman nga una na nga gidakop ang siyam ka mga pulis sa kauluhan kauban ang unom ka mga sibilyan tungod sa susamang mga kaso nga walay girekomenda nga pyansa ang korte.
