Padayonon sa kagamhanan ang ilang operasyong militar batok sa mga rebeldeng grupo, ilabi na ang CPP-NPA, bisan karong panahon sa Kapaskuhan ug Bag-ong Tuig.
Sumala sa Department of National Defense (DND), dili tinuod ug puro propaganda lamang ang gideklarang unilateral ceasefire sa rebeldeng grupong CPP-NPA.
Base sa gipagawas nga pahayag ni Defense Spokesperson Assistant Secretary Arsenio Andolong, nagpadayon ang Armed Forces of the Philippines (AFP) sa pagsuporta sa katungdanan sa Philippine National Police (PNP) sa pagpanalipod sa kalinaw ug kahapsay sa tibuok nasud, ilabi na karong holiday season.
Gipahinumdoman usab nga sa makadaghang higayon, wala giila sa gobyerno ang mga deklarasyon sa ceasefire gikan sa mga rebeldeng grupo.
Sa kasamtangang kahimtangan, sumala sa impormasyon sa DND, wala na’y nahibiling aktibong Guerilla Front ang Communist Terrorist Group (CTG) tungod sa walay hunong nga opensibang militar nga ginahimo sa kagamhanan.
