Malampuson nga gihigayon ang Trillion Peso March Rally sa Freedom Park, Roxas Avenue, Davao City kagahapong adlawa, Nobyembre 30, diin gibanabana nga kapin–kulang 200 ka katawhan ang miapil aron ipadayag ang ilang panawagan batok sa korapsyon ug pagpanubag sa tanang nalambigit sa giingong pag-abuso sa pondo sa gobyerno.
Bisan pa man sa mas gamay nga ihap kompara sa mga milabay nga mobilisasyon, nagpabilin nga lig-on ang tinubdan sa mensahe sa mga nagpakabana, ilabi na sa madaugdaugong singgit nga “Lahat ng Sangkot, Dapat Managot!”
Lakip sa mga grupo nga nakigbahin mao ang Kabataan Partylist SMR, UPMin Student Council, Anakbayan SMR, ug ubang sektor nga nagbarug batok sa pagtuis sa pondo ug panggamhanan.
Sa laing bahin, gikumpirma sa Davao City Police Office nga malinawon ang tibuok kalihokan ug walay naitalang untoward incident. Ang DCPO mibutyag nga nagpadayag ang mga rallyists sa ilang katungod sa ilawom sa kahapsay ug natuman ang seguridad sa Freedom Park.
Ang rally nagpabilin nga simbolo sa nagpadayon nga panawagan nga ipatuman ang transparency, responsibilidad, ug pagprotekta sa pondo sa katawhan, usa ka tema nga makita nga nagdasig sa daghang sektor sa lungsod ug sa nasud.
