Gidayeg sa Department of Agriculture (DA) ang preventive suspension nga gipahamtang sa Office of the Ombudsman batok sa tulo ka opisyal sa Department of Public Works and Highways (DPWH) may kalabotan sa giingong “ghost” farm-to-market road projects sa Davao Occidental.
Niadtong Mayo 21, nagsumite og reklamo ang DA batok sa pipila ka opisyal sa DPWH ug mga pribadong kontraktor tungod sa walo ka proyekto sa farm-to-market road nga nagkantidad og kapin sa P94 milyon.
Matod sa DA, gideklarang nahuman ug hingpit nang nabayran ang pipila ka proyekto bisan wala pa kini makompleto.
Sa usa ka proyekto, gikataho nga 100 porsiyento na kining nahuman bisan nagpadayon pa ang konstruksyon, bisan pa nga gibayran na kini sa hingpit niadtong 2023.
Gisuspenso og hangtod unom ka bulan ang mga opisyal sa DPWH nga sila James Ryan Jabonero, Jonathan Relacion ug Zesrel Cuga samtang nagpadayon ang mga proseso sa kaso.
Matod ni Agriculture Secretary Francisco Tiu Laurel Jr., importante nga maseguro nga mapahimuslan sa mga mag-uuma ug mangingisda ang mga farm-to-market road tungod kay makatabang kini sa pagpakunhod sa gasto sa transportasyon ug pagpadali sa pagdala sa mga produkto ngadto sa merkado.
Gikanayon sa DA nga kinahanglan maseguro nga magamit sa hustong katuyoan ang pondo alang sa imprastraktura. Samtang nagpadayon ang imbestigasyon ug mga proseso sa kaso, ang mga alegasyon batok sa mga gireklamo nagpabiling subject sa pag-imbestigar ug pagdesisyon sa may katungod nga mga awtoridad.
