Gihangyo ni Presidente Ferdinand R. Marcos Jr. si kanhing Ako Bicol Party-list Rep. Zaldy Co nga mobalik sa Pilipinas ug atubangon ang iyang mga kaso kabahin sa korapsyon sa flood control, inay nga magpagawas og walay basehang alegasyon samtang nagatago.
Una nang gisalikway sa Pangulo ang mga alegasyon ni Co, nga nag-atubang sa arrest warrant uban ang 15 ka uban pang akusado, tungod sa graft ug pagwaldas sa pondo sa anomalya nga flood control project sa Oriental Mindoro.
Gibutyag sa Presidente nga walay bili o saysay ang mga pasangil ni Co samtang nagatago kini, kay wala kini moanhi aron pamatud-an ang iyang mga alegasyon.
Gikanayon usab niya nga ang uban pang akusado ni Co anaa na sa kustodiya sa mga awtoridad.
Gihangyo sa Pangulo ang nabilin pang akusado nga mosurender ug atubangon ang ilang mga kaso.
Nagpasaka na usab ang Ombudsman og mga kaso sa graft ug malversation batok kang Co ug sa mga opisyal sa Department of Public Works and Highways (DPWH), lakip na ang uban pang mga nalambigit gikan sa Sunwest Corporations, subay sa ebidensyang nakolekta sa Independent Commission for Infrastructure (ICI) ug DPWH.
