Gipahibalo ni Department of Interior and Local Government (DILG) Secretary Jonvic Remulla nga katapusan nga namatikdan si kanhing Congressman Zaldy Co sa Japan.
Gibutyag kini sa kalihim pipila ka oras human ipahibalo ni Pangulong Ferdinand Marcos Jr. nga adunay giisyu nga warrant of arrest batok kang Co ug sa 17 pa ka mga kaubanan.
Sumala sa kalihim, karon nga adunay na’y kaso nga gisaka batok sa kanhing kongresista, mahimo nang i-apply ang red notice sa International Police (Interpol).
Gitakda usab nga pangayuon sa DILG sa Department of Foreign Affairs (DFA) ang pagkansela sa pasaporte ni Co. Apan, sa usa ka pahayag, giingon sa DFA nga mahimo lamang nila ikansela ang Philippine passport sa usa ka Filipino citizen kung adunay court order gikan sa usa ka korte sa Pilipinas.
Giklaro usab ni Sec. Remulla nga wala pa silay klarong impormasyon kung asa karon nahimutang si Co.
Apan iyang gibutyag ang mga miaging lokasyon nga giadtuan sa kanhing magbabalaod sama sa Amerika, Europe, Singapore, Portugal, Spain, ug ang labing bag-o, Japan.
Samtang, gibutyag sa kalihim nga susihon usab sa mga awtoridad ang mga pinuy-anan ni Co sa Pilipinas basin ug nakabalik na kini sa nasud.
Kahinumdoman nga niadtong Setyembre karong tuiga, mibiyahi si Co paingon sa Amerika aron magpatambal sa iyahang sakit.
Sa iyang video statement sa miaging mga semana, iyang gisulti nga nakaplano unta siya mobalik sa Pilipinas human sa State of the Nation Address (SONA) ni Pangulong Marcos Jr., apan gipugngan kuno siya ni kanhing House Speaker Martin Romualdez ug gihulga nga patyon kung mosulti siya batok kanila.
Kahinumduman usab nga sa mismo’ng SONA sa Pangulo niadtong Hulyo, iyang gipadayag ang mga palpak ug “ghost” flood control projects ug iyang gisaway ang mga nalambigit sa maong maanomalya nga proyekto pinaagi sa pagpamulong, “mahiya naman kayo.”
