Wala na tagda ni Pangulong Ferdinand Marcos Jr. ang mga akusasyon ni kanhi Ako Bicol Party-list Representative Zaldy Co batok kaniya may kalabotan sa gikaingong P100 bilyon nga insertions sa 2025 national budget.
Sa pagbisita niini sa mga lugar nga naigo sa bagyo sa Negros Occidental kagahapong adlawa, gipangutana ang Pangulo kabahin sa iyahang komentaryo sa mga pasangil sa kanhing magbabalaod.
Mubo ra ang tubag sa Pangulo: “I don’t want to even dignify what he was saying.”
Kahinumdoman nga sa unang video nga gipagawas ni Co niadtong Biyernes, iyahang gibutyag nga ang Pangulo mismo ang nagmando sa pagsulod sa P100 bilyon nga kantidad sa proyekto pinaagi sa bicam.
Sa ikaduhang video nga gipagawas ni Co kagahapong adlawa, nagpakita kini og mga hulagway sa mga maleta-maleta nga naglangkob kuno og kwarta nga iyang gipadala uban ang iyahang staff ug security guards ngadto sa balay sa Pangulo ug ni kanhing House Speaker Martin Romualdez.
Gibutyag pa ni Co nga nakadawat ang Pangulo og 25% gikan sa giingong insertions nga tugbang matud pa sa P25 bilyon.
Apan una na nga gisupak ni Presidential Communications Office (PCO) Secretary Dave Gomez ang Part 2 video statement ni Co, nga iyahang gitawag nga walay basehan ug puro lamang hungihong.
Gibutyag ni Gomez nga ang baruganan sa Palasyo mao ang pag-awhag kang Co nga mobalik sa Pilipinas, pirmahan ang iyang sinulat nga pahayag, panumpaan kini, ug atubangon ang iyahang mga akusasyon.
