Gipahayag sa Malacañang nga dakong epekto ang ₱50 milyong pabuya sa abilidad ni Senador Ronald “Bato” Dela Rosa nga gawasnong makalihok nga dili mamatikdan, tungod sa gipakusgang operasyon sa kapulisan ug kahibalo sa publiko kabahin sa iyang pagpangita.
Base sa report sa Philippine National Police (PNP), maampingong gisusi sa mga otoridad ang tanang impormasyon nga ilang nadawat ug gilayon nga gitutokan ang mga lead nga giisip nilang kasaligan.
Apan midumili ang Palasyo sa paghatag og dugang detalye bahin sa posibleng nahimutangan sa senador ug sa mga operasyon batok kaniya aron dili mameligro ang mga impormante ug mga personahe sa kapulisan.
Giatubang ni Dela Rosa ang arrest warrant gikan sa International Criminal Court (ICC) tungod sa kasong crimes against humanity nga may kalabotan sa kampanya batok sa ilegal nga droga atol sa administrasyon ni kanhi Pangulong Rodrigo Duterte.
Nagtago ang senador human gikumpirma ni Ombudsman Jesus Crispin Remulla sa ulahing bahin sa 2025 nga adunay warrant batok kaniya.
Kaniadtong Mayo, mipakita pag-usab si Dela Rosa sa Senado aron mosuporta sa pagkapili kang Senador Alan Peter Cayetano isip Senate President. Apan wala siya madakpi ug nakagawas sa senate premises bisan pa sa presensya sa mga pulis.
Samtang, giangkon ni Interior Secretary Jonvic Remulla ning bulana nga napakyas siya sa hustong pagdumala sa pagdakop kang Dela Rosa tungod kay sobra siyang misalig sa usa ka gentleman’s agreement.
