Nagbahad si U.S. President Donald Trump batok kang Venezuelan President Nicolás Maduro, lakip na ang hulga sa pagpadala og ground troops, pag-angkon sa mga covert operation, ug pagpalupad sa nuclear-capable bombers duol sa dagat sa Venezuela.
Niadtong Huwebes (Biyernes sa Pilipinas), gikumpirma sa usa ka opisyal sa U.S. nga nagsugod ang Amerika og ikaunom nga lethal boat strike karong tuiga batok sa usa ka giingong drug boat sa Caribbean Sea, diin adunay pipila ang mga nakaluwas.
Depensa sa White House, kabahin kini sa ilahang kampanya batok sa iligal nga droga.
Sumala ni White House press secretary Karoline Leavitt, gilantaw ni Trump ang gobyerno ni Maduro ingon nga usa ka “illegitimate regime” nga giingong nalambigit sa illegal drug trade.
Bisan pa, gikanayon sa mga eksperto nga kadaghanan sa iligal nga droga sa U.S. nagaagi sa Mexico ug sa mga ruta sa Pacific Ocean, dili sa Caribbean.
Sa dihang gipangutana kung adunay mando ang CIA nga ipalagpot o ipapatay si Maduro, gitawag kini ni Trump nga usa ka “ridiculous question,” apan iyang gisiguro nga “Venezuela is feeling heat.”
Gipahibalo usab ni Trump nga gituhoan sa iyang administrasyon ang posibilidad sa pagbomba sa Venezuela, tungod matud pa niya, kontrolado na niini ang kadagatan.
Samtang, nakadawat og batikos ang Estados Unidos gikan sa Venezuelan Foreign Ministry, diin ilahang gitawag kini nga usa ka “policy of aggression, threats, and harassment.”
Kalakip niini, dul-an na sa 10,000 ka mga tropang Amerikano ang napadala sa Latin America karong tuiga, lakip na ang walo ka mga Navy ships, F-35 fighter jets, ug MQ-9 Reaper drones.
