Gipailawom na ang lalawigan sa Davao Oriental sa state of calamity human sa linog nga nahitabo niadtong Biyernes.
Gikanayon ni Davao Oriental Governor Nelson Dayanghirang nga bisan pa man nga ang ubang mga lungsod nagpahayag na og state of calamity, aduna gihapoy uban nga wala pa nagdeklara.
Dugang pa sa gobernador nga tanang ginsakpan niini nga munisipalidad ang apektado sa linog.
Subay sa datos nga gipaguwa kagahapon sa buntag, kapin 66,000 ka mga pamilya ang naapektuhan sa duha ka linog, kapin 100 ka mga balay usab ang hingpit nga nadaut ug 500 pa ang partially nga nadaut.
Gibutyag ni Dayanghirang nga ang linog nakakalas og tulo ka mga kinabuhi.
Kagahapong adlawa gipahigayon ang usa ka panagminting uban sa mga kalihim sa Gabinete ug gibutyag sa gobernador nga ang nasudnong gobyerno naningkamot aron masiguro nga ang tanang tabang mahatag sa katawhan sa lalawigan.
Ang maong miting gitambungan nila Sec. Vince Dizon sa DPWH, Sec.Rex Gatchalian sa DSWD, ug Sec.Sonny Angara sa DepEd nga mibisita usab sa mga lugar nga apektado sa linog.
Gipahigayon niini ang inspeksyon sa Manay District Hospital, dayon gibutyag ni Secretary Dizon nga ang maong ospital dili na angay gamiton tungod sa grabe nga kadaut nga naangkon gikan sa linog.
Tungod niini, gibutyag sa kalihim nga kinahanglan niining gamiton ang temporary medical tents tungod sa delikado na mga kahimtang sa gambalay.
Nasayran nga usa sa mga hagit nga giatubang sa mga doktor ug pasyente mao ang kakuwang sa limpyo nga tubig usa ka butang nga importante kaayo sa maong pasilidad.
Nagdugang pa usab sa problema ang kakulang sa kasilyas ug tungod niini nagpatuman na ang lalawigan sa pagbutang og mga portalets sa compound sa ospital.
Sa adlaw nga Lunes, gibutyag ni Dayanghirang nga ibalhin ang mga pasyente ngadto sa ilahang super health center. Gipasalig usab ni Sec. Dizon nga daling ayuhon ang pasilidad aron subling magamit kini sa mga pasyente.
Samtang sa kapin 100 ka eskwelahan sa Munisipyo sa Manay, gibutyag ni Secretary Sonny Angara nga 38 niini ang hingpit nga nadaut.
Sa ingon niini nga mga sitwasyon, gikanayon sa education secretary nga gamiton ang ilahang quick response fund aron ang DPWH makapadayon dayon sa mga pag-repair.
Gipasalig usab ni Social Welfare Secretary Rex Gatchalian sa mga residente nga apektado sa linog nga ang gobyerno naglihok aron masiguro nga madawat nila ang tabang nga ilang gikinahanglan, ug iyang gipasabot nga ang repacking sa relief goods padayon nga gihimo karong panahuna.
Samtang giangkon usab sa mga residente sa Davao Oriental nga padayon gihapon silang nahadlok ug nabalaka,ang uban sumala pa kanila dili na makatulog og tarong tungod sa mga pagtay-og.
Gumikan niini, ipahigayon usab sa maong buhatan ang assessment ngadto sa mga biktima sa linog ilabi na sa ilahang mga kabalaka.
